एजेन्सी । संयुक्त राष्ट्र संघको भोकमरी अनुगमन गर्ने संस्था (IPC) ले गाजाको उत्तरी क्षेत्रमा भोकमरीको अवस्था घोषणा गरेपछि इजरायल र अमेरिकाले उक्त रिपोर्टलाई खारेज गर्दै त्यसलाई ‘झूटो’ र हमासले फैलाएको ‘झूटो कथा’ भनेका छन्। युएनको एकीकृत खाद्य सुरक्षा चरण वर्गीकरण प्रणाली (IPC) ले गत शुक्रवार गाजापट्टीको केही भागमा भोकमरी सुरु भएको आधिकारिक रूपमा घोषणा गरेको थियो। IPC को रिपोर्टअनुसार, गाजामा अनुमानित ५,१४,००० मानिसहरू, अर्थात् त्यहाँको जनसंख्याको लगभग एक चौथाई, भोकमरीको चपेटामा परेका छन् र सेप्टेम्बरको अन्त्यसम्ममा यो संख्या ६,४१,००० पुग्ने अनुमान गरिएको छ।
IPC को प्रतिवेदनले जुलाई १ र अगस्ट १५ बीचको तथ्याङ्क विश्लेषण गर्दा भोकमरी र गम्भीर कुपोषणको अवस्था पुगेको स्पष्ट प्रमाण देखाएको बताएको छ। मृत्युदरको तथ्याङ्क सङ्कलन गर्न गाह्रो भए पनि रिपोर्टले आवश्यक मापदण्ड पुगेको निष्कर्ष निकालेको छ।
IPC को भोकमरी घोषणालाई ‘खुलेआम झूट’ र ‘आधुनिक रक्त निन्दा’: प्रधानमन्त्रीको कार्यालय
यसैबीच, इजरायलले उक्त रिपोर्टको कडा शब्दमा खण्डन गर्दै IPC ले हामासका स्रोतहरूमाथि निर्भर रहेको र भोकमरी घोषणा गर्नका लागि आफ्नो नियमहरूलाई ‘घुमाएको’ आरोप लगाएको छ। इजरायलका प्रधानमन्त्रीको कार्यालयले एक विज्ञप्ति जारी गर्दै IPC को भोकमरी घोषणालाई ‘खुलेआम झूट’ र ‘आधुनिक रक्त निन्दा’ भनेको छ। कार्यालयले इजरायलको ‘भोकमरी रोकथाम गर्ने नीति’ रहेको र मानवीय सहायता प्रयासहरूलाई उक्त प्रतिवेदनले बेवास्ता गरेको दाबी गरेको छ।
युद्ध सुरु भएदेखि लाखौँ टन सहायता गाजामा पठाएको दाबी
इजरायलले युद्ध सुरु भएदेखि लाखौँ टन सहायता गाजामा पठाएको दाबी गर्दै राष्ट्र संघले आफ्ना गोदामहरूमा पुगेका १० मध्ये १ मात्र ट्रकको सामान वितरण गरेको आरोप लगाएको छ। त्यसैगरी, अमेरिकी विदेश मन्त्रालयले पनि उक्त रिपोर्टप्रति शंका व्यक्त गर्दै IPC ले हालसालै भोकमरीको परिभाषा परिवर्तन गरेको सम्बन्धमा ‘विश्वसनीय रिपोर्टहरू’ को खोजी गरिरहेको बताएको छ।
अमेरिकाले गाजामा मानवीय अवस्था ‘गम्भीर चिन्ता’ को विषय रहेको स्वीकार गरे पनि ‘हामासले जानाजानी ठूलो भोकमरीको झूटो कथालाई राजनीतिक दबाबका लागि प्रचार गरिरहेको’ आरोप लगाएको छ। अमेरिकी विदेश मन्त्रालयका अनुसार, विगत दुई महिनामा गाजा आइपुगेका अधिकांश सहायता ट्रकहरू लुटिएका छन् ।
यस घटनाक्रमले गाजामा मानवीय सहायता वितरण र तथ्याङ्कको विश्वसनीयतामाथि अन्तर्राष्ट्रिय स्तरमा ठूलो बहस सिर्जना गरेको छ।